ایرانی بحریہ نے مشقوں کے دوران اپنی ہی شپ پر میزائل دے مارا، 19 اہلکار ہلاک

تہران(سی این پی) ایران کی بحریہ نے مشقوں کے دوران اپنے ہی بحری جہاز پر میزائل داغ دیا جس کے نتیجے میں جہاز میں سوار نیوی کے 19 اہلکار ہلاک ہوگئے۔میڈیا رپورٹ کے مطابق ایرانی فوج نے واقعے کی تصدیق کرتے ہوئے بتایا کہ واقعہ اتوار کے روز اس وقت پیش آیا جب فوجی مشقوں کے دوران خلیج عمان میں میزائل کو ہدف کی طرف فائر کیا گیا لیکن وہ قریب ہی موجود ایران کی سپورٹ شپ کو جالگا جس کے نتیجے میں جہاز میں سوار 19 افراد ہلاک اور 15 زخمی ہوگئے۔میڈیارپورٹ کے مطابق واقعہ خلیج عمان پر تہران کے جنوب مشرق میں واقع جسک پورٹ کے قریب پیش آیا جہاں اتوار کے روز جسک اور چاہ بہار کے پانی میں نیوی کی مشقیں جاری تھیں اور اس دوران ایک سپورٹ شپ میزائل کا نشانہ بن گئی۔ایران کے سرکاری میڈیا نے واقعے کو حادثہ قرار دیتے ہوئے کہا ہے کہ جہاز اپنے ہدف کو نشانہ بنارہا تھا کہ شپ ہدف کے انتہائی قریب تھی جس سے واقعہ پیش آیا، حادثے کا شکار بننے والی شپ کو 2018 میں تیار کیا گیا تھا جو سمندر سے میزائل فائر کرنے کی صلاحیت رکھتی تھی۔میڈیارپورٹ کے مطابق اب تک اس بات کی تصدیق نہیں ہوسکی ہے کہ حادثے کے وقت جہاز میں کتنے ممبران سوار تھے ، ایرانی پاسداران انقلاب نے واقعے کو انسانی غلطی قرار دیا ہے۔

اپنا تبصرہ بھیجیں