اسلام آباد(سی این پی) وزیراعظم عمران خان نے کہا ہے کہ باکسر محمد علی کی طاقت اور ہمت کی پوری دنیا آج بھی معترف ہے۔تفصیلات کے مطابق سماجی رابطے کی ویب سائٹ ٹویٹر پر وزیراعظم عمران خان نے اپنے پیغام میں کہا کہ باکسر محمدعلی ایک عظیم کھلاڑی تھے۔انہوں نے کہا کہ وہ ناصرف باصلاحیت اور ذہین تھے بلکہ ان کے اعتقادات بھی عظیم تھے،وہ مادی نظریات سے بالا انسان کی تخلیق کے مقصد کو سمجھتے تھے۔وزیراعظم کا کہنا تھا کہ محمدعلی نے اپنے اعتقادات کی اس وقت حفاظت کی جب وہ پیسہ کماسکتے تھے،محمدعلی نے کھیل کے بہترین سالوں میں مشکلات کا مقابلہ کرتے ہوئے قربانی دی۔انہوں نے اپنے پیغام میں مزید کہا کہ محمدعلی کی طاقت اور ہمت کی پوری دنیا آج بھی معترف ہے۔
