کنویں کی صفائی،ایک شخص کو بچاتے تین بھائیوں سمیت ایک ہی خاندان کے 6افراد لقمہ اجل بن گئے

فتح جھنگ(سی این پی) فتح جھنگ کے نواحی گائوں بٹھو ڈھوک ملیار میں کنوئیں کی صفائی کے دوران زہریلی گیس سے 3 بھائیوں سمیت ایک ہی خاندان کے چھ افراد جاں بحق ہوگئے۔ ایک شخص کو زندہ بچا لیا گیا۔فتح جھنگ کے نواحی گائوں بٹھو ڈھوک ملیار میں گھر کے اندر واقع کنوئیں کی صفائی کے دوران المناک حادثہ پیش آیا۔ ایک ہی خاندان کے 6 افراد جاں بحق ہونے سے علاقے میں کہرام مچ گیا۔واقعہ کی اطلاع ملنے پر ریسکیو 1122 اٹک کی ٹیم نے موقع پر پہنچ کر تمام نعشوں کو نکال لیا جبکہ ایک شخص کو زندہ بچا لیا گیا ہے۔ جاں بحق ہونے والوں میں 3 سگے بھائی، ایک چچا اور دو کزن شامل ہیں۔ جاں بحق ہونے والوں میں 50 سالہ صادق ولد جہانداد، 22 سالہ اسرار ولد رحمت، 28 سالہ زبیر ولد رحمت، 26 سالہ عامر ولد رحمت، 30 سالہ عامر ولد عبداللہ اور 20 سالہ فیضان ولد قادر شامل ہیں۔ریسکیو1122 کے مطابق ایک شخص کنویں کی صفائی کرنے کےلئے کنویں میں اترا اورکنویں میں گیس بھرنے کی وجہ بے ہوش ہوگیا۔ جسے بچانے کےلئے یکے بعد دیگرے پانچ تھوڑے تھوڑے وقفے کے بعد کنویں میں اترے اور گیس کی وجہ سے دم توڑ گئے،ریسکیو 1122نے نعشوں کو کنویں سے نکالا۔

اپنا تبصرہ بھیجیں