سندھ حکومت کا وفاق سے پیاز کی بیرون ملک بر آمد پر پابندی ختم کرنے کا مطالبہ

کراچی(سی این پی)سندھ حکومت نے وفاق سے پیاز کی بیرون ملک بر آمد پر پابندی ختم کرنے کا مطالبہ کردیا اور کہا وفاق کی غلط پالیسیوں کے باعث ملکی زرعی معیشت تباہی کے دہانے پر ہے۔تفصیلات کے مطابق وزیرزراعت سندھ اسماعیل راہو نے اپنے بیان میں کہا ہے کہ وفاقی حکومت پیاز کی بیرون ملک برآمد پر پابندی ختم کرے اور پیاز کی درآمد پر عارضی پابندی لگائے۔اسماعیل راہو کا کہنا تھا کہ سب سے زیادہ پیاز کی پیداوار سندھ میں ہے، وفاق ایکسپورٹ سے فوری پابندی ہٹائے اور امپورٹ پر پابندی لگائے، سندھ میں اس سال بمپر کراپ متوقع ہے۔صوبائی وزیر نے کہا کہ سندھ میں 56 ہزار ہیکڑرز پر پیاز کاشت کی گئی ہے، اس سال سندھ میں 7 لاکھ 60 ہزار ٹن پیاز کی پیداوار متوقع ہے جبکہ صوبے کی کھپت 5 لاکھ 63 ہزار ٹن ہے اور سندھ میں ایک لاکھ 97 ہزار ٹن پیاز کھپت سے زیادہ پیدا ہوگا۔ان کا کہنا تھا کہ پورے ملک میں ایک لاکھ 51 ہزار 636 ہیکٹرز پر پیاز کی فصل لگی ہے، رواں سیزن میں ملک میں 21 لاکھ 12 ہزار 894 ٹن پیداوار متوقع ہے۔اسماعیل راہو نے کہا کہ وفاق کی غلط پالیسیوں کے باعث ملکی زرعی معیشت تباہی کے دہانے پر ہے، آلو ایکسپورٹ ہورہا ہے تو پیاز پر پابندی کیوں؟ وفاق ہمیشہ الٹے کام کرتا ہے، جب ایکسپورٹ کرنے کی ضرو رت ہوتی ہے تو امپورٹ کرتا ہے، جب درآمد کرنے کی ضرورت تھی تو خاموش تماشا دیکھتا رہا۔صوبائی وزیر کا کہنا تھا کہ وفاق ایران اور افغانستان سے پیازمنگوارہا ہے، باقی ایکسپورٹ سے پابندی نہیں ہٹارہا ، پیاز امپورٹ ہونے کی وجہ سے ملکی کاشتکاروں کو بھاری نقصان پہنچ رہا ہے۔

اپنا تبصرہ بھیجیں