لاہور(سی این پی )معروف ماڈل اوراداکارہ وینا ملک بھی آرمی چیف جنرل قمر جاوید باجوہ کی مدت ملازمت میں توسیع سےمتعلق بو ل پڑیں۔تفصیلات کے مطابق وینا ملک کا کہنا ہے کہ آرمی چیف جنرل قمر جاوید باجوہ کی مدت ملازمت میں توسیع وقت کی اہم ضرورت ہے۔سماجی تعلقات کی ویب سائٹ ٹوئٹرپرآرمی چیف کی مدت ملازمت کی توسیع کی حمایت کرتے ہوئے اداکارہ نے کہا کہ پاکستان کی موجودہ صورتحال میں آرمی چیف جنرل باجوہ مسٔلہ کشمیر کے حل، بھارت کے ساتھ کشیدہ حالات، افغان امن معاملات اور پاکستان کے اندرونی سازشوں کا بھرپورطریقے سے دفاع کررہے ہیں۔انکی مدت ملازمت میں توسیع وقت کی اہم ضرورت ہے انہوں نے یہ بھی کہا کہ جنرل قمر جاوید باجوہ نے پاکستان کے اندرونی و بیرونی دشمنوں کی سازشوں کو ناکام بنایا، پاکستان کے دفاع کو مضبوط کرنے کے ساتھ ساتھ بین الاقوامی سطح پر پاکستان کی ساکھ کو بہتر کرنے میں بھی اہم کردار ادا کیا،اس لئے آرمی چیف کی مدت ملازمت میں توسیع ضروری ہے۔اداکارہ وینا ملک نے تنقید کرتے ہوئے مزید کہا کہ جنرل قمر جاوید باجوہ کے نام پر تنقید کرنے والے اور اب ان کی توسیع کے معاملے پر عوام کو گمراہ کرنے والے افراد کا مفاد ہرگز پاکستان کے اندرونی حالات کی بہتری میں نہیں، اداروں کا ایک دوسرے کے ساتھ تعاون وقت کی اہم ضرورت ہے۔موجودہ حالات میں ہماری توجہ معاشی مسائل،غربت کے خاتمے اور شرح خواندگی میں اضافے پر ہونی چاہیے مگر ہم سب ایکسٹینشن کے معاملے میں پھنسے ہوئے ہیں.
