اسلام آباد(سی این پی) احتساب عدالت نے فاروق ایچ نائیک کی آصف زرداری سے ملاقات کی درخواست مسترد کردی۔میڈیاکے مطابق جعلی بینک اکائونٹس کیس میں گرفتار آصف زرداری سے ان کے وکیل فاروق ایچ نائیک نے ملاقات کے لیے احتساب عدالت میں درخواست دائر کی جس میں موقف اپنایا گیا ہے کہ پیر کو فاروق ایچ نائیک مصروف ہیں، پیر کے علاوہ کسی دوسرے دن آصف زرداری سے ملاقات کی اجازت دی جائے۔دورانِ سماعت جج محمد بشیر نے گزشتہ روز جعلی اکائونٹس کیس کی سماعت کے سلسلے میں حسین لوائی کے وکیل کے برتا ئوپر فاروق نائیک کے معاون وکیل سے کہا کہ اس دن آپ نے دیکھا وکیل صاحب میرے ساتھ کتنی بدتمیزی کررہے تھے، جتنی رعایت کرو سب اتنا سر پر چڑھتے ہیں۔اس پر معاون وکیل چوہدری ریاض نے کہا کہ مجھے نہیں معلوم کس وکیل نے بدتمیزی کی۔بعد ازاں عدالت نے فاروق نائیک کی آصف زرداری سے ملاقات کی درخواست مسترد کردی جب کہ جج محمد بشیر نے ریمارکس دیے کہ جس دن ملاقات کاوقت مقررہے تب ہی ملاقات کریں۔
