عوام کا پیسہ ضائع نہیں ہونے دیا جائے گا، گورنر پنجاب

نیویارک(سی این پی) گورنر پنجاب چوہدری محمد سرور کا کہنا ہے کہ عوام کا پیسہ ضائع نہیں ہونے دیا جائے گا، حکومت مخالف احتجاج کے بجائے کشمیر سے یکجہتی حالات کا تقاضا ہے۔تفصیلات کے مطابق گورنر پنجاب چوہدری محمد سرور نے امریکی میڈیا کو انٹرویو دیتے ہوئے کہا کہ پارلیمانی نظام میں وزیر اعظم اور وزیر اعلی کابینہ میں رد و بدل کر سکتے ہیں، پنجاب میں حالیہ تبدیلیوں میں وزیر اعظم کی رضا مندی شامل تھی۔گورنر پنجاب کا کہنا تھا کہ وزیر اعلی پنجاب عثمان بزدار نے وزیر اعظم کی تائید سے فیصلے کیے، پنجاب میں شعبہ صحت میں کئی مسائل موجود ہیں۔ پنجاب کی وزیر صحت انہیں حل کرنے میں کامیاب ہوجائیں گی۔انہوں نے کہا کہ پنجاب حکومت گزشتہ دور حکومت میں شروع منصوبے مکمل کرے گی، اورنج لائن ٹرین پر 200 ارب لاگت آچکی ہے، منصوبہ مکمل کریں گے۔ یہ عوام کا پیسہ ہے اسے ضائع نہیں ہونے دیا جائے گا۔چوہدری سرور کا کہنا تھا کہ وزیر اعظم واضح کر چکے عثمان بزدار ہی وزیر اعلی پنجاب رہیں گے، حکومت مخالف احتجاج کے بجائے کشمیر سے یکجہتی حالات کا تقاضا ہے۔ سیاسی جماعتیں فضل الرحمن کے اسلام آباد مارچ کا حصہ نہیں بنیں۔انہوں نے کہا کہ کرتار پور راہداری کا 85 فیصد کام مکمل ہو چکا ہے، وزیر اعظم عمران خان 9 نومبر کو راہداری کا باضابطہ افتتاح کریں گے۔ افتتاحی تقریب میں بھارتی حکام کو بھی شرکت کی دعوت دیں گے۔گورنر پنجاب نے کہا کہ کالعدم تنظیموں کے خلاف کریک ڈان میں خاطر خواہ اقدامات کیے۔ امید ہے پاکستان ایف اے ٹی ایف کو مطمئن کر پائے گا۔

اپنا تبصرہ بھیجیں