بہت جلد معیشت میں بہتری کے اشارے مل جائیں گے، صدر پاکستان

اسلام آباد(سی این پی) صدر مملکت ڈاکٹر عارف علوی نے کہا ہے کہ دو سے تین ماہ میں معیشت میں بہتری کے اشارے مل جائیں گے، اٹھارویں ترمیم میں مزید ترمیم ہوسکتی ہے۔یہ بات انہوں نے میڈیا سے گفتگو کرتے ہوئے کہی، انہوں نے کہا کہ پاکستان کی معیشت کی تین ماہ میں بہتری ہوگی، جب تحریک انصاف اقتدار میں آئی تو ہماری کوشش تھی کہ فوری تبدیلی لائیں گے لیکن وقت لگا لیکن اب معیشت میں بہتری کے آثار نظر آرہے ہیں۔صدر مملکت کا مزید کہنا تھا کہ یہ اس وجہ سے ہے کہ ایک تو ٹیکس دہندگان کی تعداد میں اضافہ ہواہے اور دوسرا بر آمد کندگان اور در آمد کندگان میں توازن پیدا ہوا ہے جس سے اب اندازہ ہوگیا ہے کہ یہ طے شدہ پالیسی ہے۔ انہوں نے کہا کہ ابھی تک کنفیوژن تھی لیکن اب یہ دور ہوگئی ہے اور لوگ سرمایہ کریں گے۔یاد رہے کہ حکومت نے کرپشن کے خلاف سخت اقدامات کیے جس کے تحت کسی کو بھی رعایت نہیں دی جارہی، وزیراعظم عمران خان نے بھی دو ٹوک موقف اپنایا ہوا ہے کہ قوم کا پیسہ لوٹنے والوں سے کوئی بات چیت نہیں کی جائے گی اور نہ وہ کسی ڈیل کے مستحق ہیں.

اپنا تبصرہ بھیجیں