نیویارک(سی این پی) وزیراعظم عمران خان نے ایک بار پھر روسی صدر پیوٹن کو دورہ پاکستان کی دعوت دیتے ہوئے کہا ہمارے عوام روسی صدر کے منتظر ہیں۔تفصیلات کے مطابق اقوام متحدہ میں پاکستان کی مستقل مندوب ملیحہ لودھی نے سماجی رابطے کی ویب سائٹ ٹوئٹر پر بتایا کہ وزیراعظم عمران خان نے ایک بار پھر روسی صدر پیوٹن کو دعوت دیتے ہوئے کہا ہمارے عوام آپ کے دورہ پاکستان کے منتظرہیں، عمران خان نے روسی وزیرخارجہ سے ملاقات میں پیوٹن کو دورے کی دعوت دی۔یاد رہے وزیراعظم عمران خان سے روس کے وزیرخارجہ سرگئی لاروف سے ملاقات ہوئی تھی ، ملاقات میں پاک روس دوطرفہ تعلقات کی نوعیت پر اظہار اطمینان کیا گیا اور دو طرفہ تعاون کے فروغ کیلئے مختلف پہلوئوں پرتبادلہ خیال کیا۔وزیر اعظم کا کہنا تھا کہ کشمیر کی تشویشناک صورتحال خطے کے امن کیلئے خطرناک ہے، عالمی برادری کشمیرمیں بیجاپابندیاں ختم کرانے کیلئے کردار ادا کرے، بھارت دنیا کی توجہ ہٹانے کیلئے پاکستان پرجھوٹے الزامات لگارہاہے۔خیال رہے 13 جون کو شنگھائی تعاون تنظیم کے سربراہ اجلاس کے دوران وزیراعظم عمران خان کی روسی صدر سے غیررسمی ملاقات ہوئی تھی ، دونوں رہنمائوں نے مصافحہ کیا اور کچھ دیر کے لیے بات چیت کی گئی تھی۔بعد ازا ںوزیراعظم عمران خان نے کہا تھا کہ پاکستان اور روس کی افواج کے درمیان تعاون بڑھا ہے، روس کے ساتھ دفاعی تعاون مزید بڑھانا چاہتے ہیں۔وزیراعظم عمران خان کا کہنا تھا کہ دورہ چین میں صدر پیوٹن سے ملاقات ہوچکی ہے، روس کے ساتھ بڑھتے ہوئے تعلقات خوش آئند ہیں۔
