وزیراعظم عمران خان کل ایک روزہ دورے پر اسکردو جائیں گے

اسلام آباد(سی این پی)وزیر اعظم عمران خان کل ایک روزہ دورہ پر اسکردو جائیں گے جہاں وہ عوامی اجتماع سے بھی خطاب کریں گے۔تفصیلات کے مطابق وزیراعظم عمران خان کل ایک روزہ دورے پر اسکردو پہنچیں گے جہاں وہ 250 بستروں کے اسپتال کا افتتاح کریں گے۔ذرائع کے مطابق وزیراعظم کل دوپہر اڑھائی بجے اسکردو میونسپل کمیٹی گرائونڈ میں عوامی اجتماع سے بھی خطاب کریں گے۔وزیراعظم عمران خان کو سات روزہ دورہ امریکہ کی کامیابی پر ہر طرف سے مبارکباد پیش کی جا رہی ہیں، خاص طور پر اقوام متحدہ کی جنرل اسمبلی سے شاندار خطاب پر انہیں زبردست خراج تحسین پیش کیا جا رہا ہے، ان کی پاکستان واپسی پر شاندار استقبال کیا گیا تھا اور ٹویٹر پر خوش آمدید عمران خان کا ٹرینڈ ٹاپ پر رہا تھا۔یاد رہے کہ رواں سال 17 جون کو وزیراعظم عمران خان نے اسکردو ایئرپورٹ کا دورہ کیا تھا جہاں چیف آپریٹنگ آفیسر نے انہیں توسیعی منصوبے سے متعلق بریفنگ دی تھی۔

اپنا تبصرہ بھیجیں