آزادی مارچ میں فضل الرحمان کو شکست ہوگی، علی امین گنڈا پور

اسلام آباد(سی این پی) وزیر امور کشمیر علی امین گنڈا پور نے کہا ہے کہ نام نہاد آزادی مارچ میں مولانا فضل الرحمان کو شکست ہوگی۔تفصیلات کے مطابق وزیر امور کشمیر علی امین گنڈا پور نے میڈیا سے گفتگو کرتے ہوئے کہا کہ نام نہاد آزادی مارچ والے قوم کے سامنے مزید بے نقاب ہوں گے، باشعور عوام فضل الرحمان کے ذاتی ایجنڈے کو ناکام بنائیں گے۔انہوں نے کہا کہ مولانا فضل الرحمان کو ڈی آئی خان کے لوگوں نے ہی رد کردیا ہے، ان کی کارکردگی قوم کے سامنے ہے، مولانا طلبا کو اپنے مذموم مقاصد کے لیے استعمال نہ کریں۔علی امین گنڈا پور نے کہا کہ مولانا فضل الرحمان نے اپنے ذاتی مقاصد کے لیے ہمیشہ مذہب کا سہارا لیا ہے، ان کو اسلام آباد کی یادیں ستا رہی ہیں۔وزیر امور کشمیر علی امین گنڈا پور نے کہا کہ مسئلہ کشمیر پر وزیراعظم کے کردار کی عوام معترف ہے، عمران خان عالمی سطح کے لیڈر بن کر سامنے آرہے ہیں۔واضح رہے کہ جے یو آئی (ف)نے 27 اکتوبر کو اسلام آباد کی طرف مارچ کا اعلان کیا ہے، مولانا فضل الرحمان کا کہنا تھا کہ مظاہروں کے ساتھ اسلام آباد کی طرف آزادی مارچ شروع ہوگا۔یاد رہے کہ گزشتہ روز مولانا فضل الرحمان اور بلاول بھٹو کے درمیان ملاقات ہوئی تھی جو بے نتیجہ رہی، پی پی چیئرمین بلاول بھٹو میڈیا سے گفتگو کیے بغیر روانہ ہوگئے تھے۔

اپنا تبصرہ بھیجیں