بھارت کو کشمیر سے بھاگنا پڑے گا، اسپیکر پنجاب اسمبلی

لاہور(سی این پی) اسپیکر پنجاب اسمبلی چودھری پرویزالہی کا کہنا ہے کہ کشمیری بھائیوں کے ساتھ ہر محاذ پر کھڑے ہیں، بھارت کو کشمیر سے بھاگنا پڑے گا۔ان خیالات کا اظہار اسپیکر پنجاب اسمبلی چودھری پرویزالہی نے پاکستان مسلم لیگ برطانیہ کے چیف آرگنائزر چودھری نعیم وڑائچ سے ملاقات کے موقع پر کیا۔اس موقع پر سیکرٹری پنجاب اسمبلی محمد خان بھٹی بھی موجود تھے۔ چودھری پرویزالہی نے کہا کہ پاکستان مسلم لیگ کشمیری بھائیوں کے ساتھ ہر محاذ پر کھڑی ہے اور کشمیر کی آزادی تک ان کا ساتھ دیتی رہے گی۔انہوں نے کہا کہ کشمیر میں بھارتی ظلم کی داستان بڑھتی جا رہی ہے، انشا اللہ بھارت کو کشمیر سے بھاگنا پڑے گا۔ان کا کہنا تھا کہ اوورسیز پاکستانی ملک کا قیمتی اثاثہ ہیں، کشمیر کے ایشو کو یورپ، امریکا سمیت دیگر ممالک میں پاکستانیوں نے اجاگر کیا اور بھارت کے ظلم کی داستانوں سے دنیا کو آگاہ کیا۔دریں اثنا چودھری نعیم وڑائچ نے چودھری شجاعت حسین کی خیریت دریافت کی۔ چودھری پرویزالہی نے بتایا کہ ان کی طبیعت پہلے سے بہت بہتر ہے۔ انہوں نے دعا کرنے والوں کا شکریہ بھی ادا کیا۔

اپنا تبصرہ بھیجیں