اسلام آباد(سی این پی) حکومت نے صحت انصاف کارڈ کا دائرہ کار ملک بھر تک پھیلانے کا فیصلہ کر لیا ہے۔تفصیلات کے مطابق وزیر اعظم عمران خان کی ہدایت پر حکومت نے صحت انصاف کارڈ کا دائرہ کار ملک بھر تک پھیلانے کا فیصلہ کر لیا ہے، اس سلسلے میں وزیر اعظم نے صحت انصاف کارڈز کے اجرا اور اس کے نتائج کی تفصیلات طلب کر لی ہیں۔رپورٹ کے مطابق انضمام شدہ قبائلی علاقوں میں صحت کارڈ کی فراہمی کا 100 فی صد ٹارگٹ مکمل کر لیا گیا ہے، سابقہ فاٹا میں شہری اپنے شناختی کارڈ کو بہ طور صحت انصاف کارڈ استعمال کر رہے ہیں، مفت علاج کی سہولت ملنے پر شہریوں نے وزیر اعظم سے اظہار تشکر کیا۔میڈیا کے مطابق شہریوں کا کہنا ہے کہ وہ ڈاکٹرز کی بھاری فیسوں اور زیادہ خرچ کی وجہ سے علاج نہیں کرا پا رہے تھے، انصاف کارڈ ملنے پر مہنگے علاج کی بھی مفت سہولت مل رہی ہے۔خیال رہے کہ خیبر پختون خوا کے 62 فی صد افراد کو مفت علاج معالجے کی سہولت مل گئی ہے، فروری 2020 تک صوبے میں 100 فی صد مفت علاج کی سہولت فراہم ہوگی، وزیر اعظم نے 2020 میں ملک بھر میں مستحق افراد تک صحت کارڈ پہنچانے کی ہدایت جاری کر دی ہے۔صحت کارڈ رکھنے والا ہر شہری 7 لاکھ 20 ہزار روپے تک کا مفت علاج کرا سکتا ہے، سرکاری اسپتال کے علاوہ بڑے نجی اسپتالوں میں بھی مفت علاج کی سہولت ہوگی، سرجری، آپریشن یا طبی معائنے کے لیے ہزاروں روپے خرچ نہیں کرنے پڑیں گے۔
