اسلام آباد(سی این پی) کشمیری حریت رہنما یاسین ملک کی اہلیہ مشال ملک کا کہنا ہے کہ کشمیریوں نے عید قید تنہائی میں گزاری ہے، بھارت کرونا وائرس کی آڑ میں بلیک آئوٹ کر کے کشمیریوں کا قتل عام کر رہا ہے۔تفصیلات کے مطابق کشمیری حریت رہنما یاسین ملک کی اہلیہ مشال ملک کا کہنا ہے کہ مقبوضہ کشمیر کی موجودہ صورتحال پر شدید تشویش لاحق ہے، بھارت کرونا وائرس کی آڑ میں بلیک آئوٹ کر کے کشمیریوں کا قتل عام کر رہا ہے۔مشال ملک کا کہنا تھا کہ کشمیر میں لاک ڈائون کے باعث خوراک کی شدید قلت ہے، یاسین ملک سمیت قید حریت رہنمائوں کی زندگی کو خطرات ہیں۔ مقبوضہ کشمیر میں کرونا مریضوں کو کوئی سہولت فراہم نہیں کی جارہی۔انہوں نے کہا کہ کئی مہینوں سے لاک ڈائون نے کشمیریوں کی زندگی اجیرن کردی، بھارتی فورسز ظلم اور لاک ڈائون سے کشمیریوں کو نفسیاتی مریض بنا رہی ہے۔مشال ملک کا کہنا تھا کہ کشمیریوں کی جدوجہد ظلم و ستم اور جبر کے باوجود بھی جاری ہے، مودی حکومت مسلم دشمن ایجنڈے پر عمل پیرا ہے۔ کشمیریوں نے عید قید تنہائی میں گزاری۔ عالمی ادارہ صحت مقبوضہ کشمیر میں صحت سہولیات کا جائزہ لے۔
