اسلام آباد(سی این پی) وزیراعظم شہباز شریف نے بجلی کے ترسیلی نظام، نیشنل ٹرانسمیشن اور ڈسپیچ کمپنی کی اصلاحات و تنظیم نو کی منظوری دیدی۔وزیراعظم شہباز شریف کی زیرصدارت بجلی شعبے کی اصلاحات کے جائزے کے حوالے سے اجلاس ہوا جس میں شہباز شریف نے بجلی کے ترسیلی نظام، نیشنل ٹرانسمیشن اور ڈسپیچ کمپنی کی اصلاحات و تنظیم نو کی منظوری دی۔وزیراعظم نے سفارشات کو حتمی شکل دینے اور اصلاحات و تنظیم نو کا اطلاق یقینی بنانے کیلیے کمیٹی قائم کردی جب کہ بجلی کے شعبے کی اصلاحات کا نفاذ یقینی بنانے کیلیے وزیراعظم آفس میں سیل قائم کردیا گیا ہے۔وزیراعظم نے کم بجلی خرچ کرنے والے پنکھوں کو کم آمدن والے صارفین کو فراہم کرنے کیلیے جامع پلان بھی طلب کر لیا، اس کے علاوہ شہباز شریف نے صنعتی شعبے کو کم نرخوں پر بجلی دینے کالائحہ عمل پیش کرنے کا حکم دیا ہے۔وزیراعظم نے کہا کہ حکومتی محکموں میں موثر سزا اور جزا کے نظام کے بغیر اصلاحات ممکن نہیں۔
