لاہور (سی این پی) اپوزیشن لیڈر شہباز شریف کے صاحبزادے سلمان شہباز کے ملازمین کے بینک اکائونٹ میں نواعشاریہ پانچ ارب روپے کا انکشاف سامنے آیا ، ایف آئی اے بینکنگ کرائم سرکل لاہور نے ان خفیہ بینک اکائونٹس کا سراغ لگالیا ہے۔تفصیلات کے مطابق ایف آئی اے بینکنگ کرائم سرکل لاہور نے اپوزیشن لیڈر شہباز شریف کے صاحبزادے سلمان شہباز کے خفیہ بینک اکائونٹس کا سراغ لگالیا ہے۔جس میں سلمان شہباز کے ملازمین کے بینک اکائونٹ میں نواعشاریہ پانچ ارب روپے کا انکشاف ہوا، یہ ملازمین رمضان شوگر مل اور العریبیہ شوگر مل میں کام کرتے ہیں۔سلمان شہباز کے چپڑاسی مقصود کے بینک اکائونٹ میں 2.3 ارب روپے ہونے کاانکشاف ہواہے، مقصود چپڑاسی نے ان پیسوں سے ڈیڑھ کروڑ روپے کی ایک قیمتی مرسڈیزکار بھی خریدی۔شبیر قریشی کلرک کے اکائونٹ میں ایک ارب روپے، رانا وسیم کے اکائونٹ میں 24 کروڑ، اقرار کے اکائونٹ میں 64 کروڑ، تنویر الحق کلرک کے اکائونٹ میں 52 کروڑ، خضر حیات کلرک کے اکائونٹ میں 1.2 ارب روپے اور توقیر الدین کے اکائونٹ میں 45 کروڑ روپے جمع کرائے جانے کا انکشاف ہوا۔ایف آئی اے بینکنگ کرائم سرکل لاہور نے ان خفیہ بینک اکائونٹس کی معلومات مشترکہ تحقیقاتی ٹیم کے حوالے کیں جبکہ تحقیقات کا دائرہ مزید وسیع کر دیا۔ایف آئی اے بینکنگ کرائم سرکل نے تمام بینکوں سے ملازمین کے نام پر خفیہ اکائونٹ اورایس ای سی پی سے ملازمین کے نام پر کمپنیوں کی تفصیلات بھی طلب کرلی گئی ہیں۔
