کراچی کے علاقے ناظم آباد میں عید گاہ گرائونڈ کے قریب پولیس مقابلے میں دو ڈاکو ہلاک اور ایک پولیس اہلکار شہید ہوگیا۔ناظم آباد پولیس کے مطابق گشت پر مامور اہلکاروں نے دو موٹر سائیکل پر سوار تین افراد کو رکنے کا اشارہ کیا لیکن انہوں نے رکے بغیر اہلکاروں پر فائرنگ کردی۔پولیس حکام نے بتایا کہ فائرنگ کے تبادلے میں دو ملزمان ہلاک ہوگئے جب کہ ایک اہلکار شہید ہوگیا۔ایس ایس پی سینٹرل عارف اسلم را ئونے میڈیا سے گفتگو کرتے ہوئے بتایا کہ شہید اہلکار ذیشان 2014 میں بھرتی ہوا تھا جو عید گاہ گرائونڈ میں ساتھی اہلکار شاہمیر کے ساتھ ڈکیتی کی وارداتوں کی روک تھام کے لیے گشت پر تھا۔انہوں نے بتایا کہ مقابلے میں مارے گئے ڈاکوئوں کی شناخت عبدالباسط اور حبیب خان کے نام سے ہوئی ہے جن کا تعلق خضدار سے ہے جب کہ ایک ڈاکو فرار ہوگیا ہے جس کی تلاش جاری ہے۔ایس ایس پی سینٹرل عارف اسلم را ئونے بتایا کہ کہ ہلاک ہونے والے ڈاکو صبح سویرے عیدگاہ کے علاقے میں لوٹ مار کرتے تھے تاہم ڈاکوئوں کا کرمنل ریکارڈ اکٹھا کیا جارہا ہے۔
