اسلام آباد(سی این پی) وفاقی وزیر برائے انسانی حقوق شیریں مزاری کا کہنا ہے کہ بھارت نے پاکستان کیخلاف ہتھیارجمع کرنا شروع کردیئے ہیں اور فرانس سے رافیل طیاروں کی جلد فراہمی کی درخواست کردی ہے۔تفصیلات کے مطابق وفاقی وزیر برائے انسانی حقوق شیریں مزاری نے سماجی رابطے کی ویب سائٹ ٹوئٹر پر اپنے بیان میں کہا بھارت نے فرانس سے رافیل طیاروں کی جلدفراہمی کی درخواست کی، چین کے ہاتھوں ذلت کے بعد طیاروں سے چین بھارت تعلقات کی نوعیت نہیں بدلے گی، واضح ہے کہ بھارت پاکستان کیخلاف ہتھیارجمع کررہا ہے، بالاکوٹ میں چوٹ کھانے کے بعد بھارت تلملارہاہے۔یاد رہے گذشتہ روز گذشتہ روز وزیراعظم عمران خان نے قومی اسمبلی میں خطاب کرتے ہوئے کہا تھا کہ یہ ممبئی میں ہونے والی دہشت گردی جیسا منصوبہ بنایاگیا تھا، ہمیں کوئی شک نہیں پاکستان اسٹاک ایکسچینج پر حملہ بھارت میں پلان ہوا، دہشت گرد حملے سے نمٹنے کے لیے ہماری پوری تیاری تھی۔وزیراعظم پاکستان نے انٹیلی جنس ایجنسیز کو خراج تحسین پیش کرتے ہوئے کہا تھا کہ دنیا کا کوئی بھی طاقتور ملک اس طرح کا حملہ نہیں روک سکتا تھا۔
