واشنگٹن(سی این پی) امریکا کی متعدد ریاستوں میں کاروبار کھلنا شروع ہو گئے، تاہم ریاستیں کھولنے پر وائٹ ہائوس اور سی ڈی سی میں اختلافات برقرار ہیں، دوسری طرف کرونا وائرس کی وبا پھر سے سر اٹھانے لگی ہے۔ میڈیا رپورٹس کے مطابق امریکی ریاست کیلی فورنیا میں پہلے مرحلے میں 50 سے زائد کائونٹیز کھولی جا رہی ہیں، ریاست میں پروفیشنل اسپورٹس جون میں شروع ہو جائیں گے لیکن کھیلوں کی سرگرمیوں میں شائقین کو آنے کی اجازت نہیں ہوگی۔گورنر ورجینیا نے ایک بیان میں کہا کہ ریاست کا ساحل آئندہ جمعے کو سخت شرائط کے ساتھ کھولا جائے گا۔ گورنر ورجینیا کے مطابق ساحل پر گروپس کو اکھٹا ہونے کی اجازت نہیں ہوگی، بڑی تعداد میں خیمے اور چھتریاں لانے کی بھی اجازت نہیں ہوگی۔ادھر ریاستیں کھولنے پر وائٹ ہائوس اور سی ڈی سی میں اختلافات برقرار ہیں، سی ڈی سی نے عبادت گاہوں، تعلیمی اداروں اور کاروبار کے لیے نئی گائیڈ لائن جاری کی تھی تاہم وائٹ ہائوس نے سینٹر فار ڈیزیز کنٹرول کی تجاویز کو مسترد کر دیا ہے۔دوسری طرف امریکا میں کرونا وائرس کی وبا پھر سے سر اٹھانے لگی ہے، مثبت کیسز کی تعداد 15 لاکھ سے تجاوز کر گئی، جب کہ ہلاکتوں کی تعداد 92 ہزار کے قریب پہنچ گئی، امریکا میں پیر کے روز 22 ہزار سے زائد کرونا کیس رپورٹ ہوئے، جب کہ 1 ہزار سے زائد کرونا مریض موت کا شکار ہوئے۔
