کابل(سی این پی)افغانستان کے دورے پر آئے عالمی ادارہ صحت (ڈبلیو ایچ او) کے سربراہ ٹیڈروس نے افغان وزیراعظم ملا محمد حسن اخوند اور دیگر حکام سے ملاقات کی ہے۔میڈیا رپورٹس کےمطابق عالمی ادارہ صحت کے سربراہ ٹیڈ روس نے افغانستان کے وزیراعظم ملا محمد حسن اخوند سے صدارتی محل میں ملاقات کی۔ملاقات میں عالمی ادارہ صحت کے سربراہ،ان کے وفد سمیت اقوام متحدہ کے مشن کی سربراہ نے شرکت کی۔طالبان کی جانب سے وزیراعظم، نائب وزیراعظم ملا برادر اور قائم مقام وزیرخارجہ امیر خان متقی میٹنگ میں شریک ہوئے، افغان حکومت کی جانب سے میٹنگ کی تفصیل نہیں بتائی گئی۔ڈبلیو ایچ او کے سربراہ ٹیڈروس نےکابل پہنچنے کے بعد ٹوئٹر پر بتایا تھا کہ میں افغانستان میں ہوں، افغان عوام کی صحت کی حفاظت ڈبلیو ایچ او کی اولین ترجیح ہے۔ٹیڈروس کا کہنا تھا کہ دورے میں وہ افغانستان میں صحت کی سہولیات کا جائزہ لیں گے اور ہیلتھ ورکر اور طالبان قیادت سے اس معاملے پر بات بھی کریں گے۔
