اسلام آباد(سی این پی) نیشنل کمانڈاینڈ آپریشن سینٹر نے ملک میں کوروناکی مجموعی صورتحال پراظہار اطمینان کرتے ہوئے صوبوں کو ویکسی نیشن میں تیزی لانے کی ہدایت کردی۔تفصیلات کے مطابق وفاقی وزیر اسد عمر کی زیرصدارت نیشنل کمانڈاینڈ آپریشن سینٹر کا اجلاس ہوا، اجلاس میں ملک میں کورونا کی صورتحال و نیشنل ویکسین اسٹریٹجی پر غور کیا گیا۔اجلاس میں متعلقہ حکام نے این سی او سی کو کورونا کیسز اور پھیلا ئوکی شرح پر بریفنگ دی گئی، جس پر این سی اوسی نے ملک میں کوروناکی مجموعی صورتحال پراظہار اطمینان کیا۔این سی اوسی کا کہنا تھا کہ ملک میں مثبت کوروناکیسز،اموات میں کمی آئی ہے اور کورونامریضوں کے اسپتالوں میں داخلوں میں کمی ریکارڈ کی گئی۔نیشنل کمانڈاینڈ آپریشن سینٹر نے صوبوں کو ویکسی نیشن میں تیزی لانے کی ہدایت کرتے ہوئے کہا ویکسین کے مقررہ اہداف کے حصول کیلئے ویکسی نیشن تیز کی جائے۔خیال رہے پاکستان میں کورونا کیسز اور اموات کی شرح کم ترین سطح پر آگئی ہے ، 24 گھنٹوں میں کورونا سے 5 اموات ریکارڈ کی گئی اور 315 کیسز سامنے آئے۔
