لاہور(سی این پی )بیس بال کی عالمی رینکنگ میں پاکستان نے 11 درجے ترقی کر لی ہے، جاپان پہلے، میکسیکو دوسرے اور امریکا تیسرے نمبر پر موجود ہے۔حال ہی میں تائیوان میں ختم ہونے والی ایشین بال چیمپئن شپ میں پاکستان شاندار کارکردگی کا مظاہرہ کر کے 5 ویں نمبر پر رہا تھا، اس کارکردگی کی وجہ سے پاکستان واحد ٹیم ہے جس کو 11 درجے ترقی ملی۔
ورلڈ بیس بال اینڈ سوفٹ بال کنفیڈریشن کی جانب سے نئی رینکنگ جاری کی گئی ہے جس میں پاکستان 155 پوائنٹس کے ساتھ 38 ویں پوزیشن پر آگیا ہے، نئی رینکنگ میں جاپان کی سبقت برقرار ہے، میکسیکو دوسرے، امریکا تیسرے نمبر پر ہے، جنوبی کوریا کی چوتھی اور چائنیز تائی پے کی 5 ویں پوزیشن ہے، روایتی حریف بھارت کا 68 واں نمبر ہے۔
صدر پاکستان بیس بال فیڈریشن سید فخر علی شاہ نے عالمی رینکنگ میں نمایاں بہتری پر خوشی کا اظہار کرتے ہوئے کہا کہ پاکستان میں بیس بال کا بہت ٹیلنٹ ہے، ایشین بیس بال چیمپئن شپ میں قومی ٹیم کی جانب سے امان اور مشرف نے نمایاں کھیل کا مظاہرہ کیا، ایک طویل عرصہ سے مطالبہ کر رہے ہیں کہ ہمیں بیس بال کا الگ سے گراؤنڈ مہیا کیا جائے۔
