لندن (سی این پی) غیرقانونی مہاجرین کی روک تھام کیلئے برطانیہ نے ہنگامی اقدامات کا آغاز کردیا ہے اس سلسلے میں برطانوی حکومت نے غیرملکیوں کیلئے نئے قوانین لاگو کرنے کا فیصلہ کیا ہے۔برطانیہ میں داخل ہونیوالے غیر قانونی مہاجرین کی روک تھام یقینی بنانے کیلئے ہنگامی بنیادوں پر اقدامات کا سلسلہ تیز کرتے ہوئے حکومت نے فیصلہ کیا ہے کہ 8جون سے برطانیہ آنے والوں کو 14روز تک قرنطینہ کیا جائے گا، اس حوالے سے برطانوی ہوم آفس اعلان کیا ہے کہ قرنطینہ میں نہ جانے والے غیرملکیوں کو واپس روانہ کردیا جائے گا۔اس کے علاوہ ترجمان کا مزید کہنا ہے کہ قرنطینہ قوانین کی خلاف ورزی کرنے والوں پر ایک ہزار پائونڈ تک جرمانہ بھی ہوسکتا ہے۔برطانوی وزیرداخلہ کا کہنا ہے کہ مذکورہ قوانین کا مقصد کورونا وائرس سے عوام کو محفوظ رکھنا ہے۔واضح رہے کہ فرانس سے آنے والے مہاجرین کی کشتیوں کو واپس بھجوانے کے بارے میں بھی نئے قوانین کی منصوبہ بندی شروع کر دی گئی ہے۔انسانی حقوق کے مختلف قوانین کے تحت عدالتوں میں ملک بدری میں تاخیری حربے روکنے کیلئے سنجیدگی سے قوانین کا جائزہ لیا جا رہا ہے۔ذرائع کے مطابق بریگزٹ کے بعد برطانیہ اور یورپی یونین کے درمیان کئی معاملات پر نئی قانون سازی زیر غور ہے، جس میں مہاجرین کی واپسی سرفہرست ہے، برطانوی حکام بعض اسکیموں میں رضا کارانہ طور پر سیاسی پناہ کے متلاشیوں کو قبول کرنے کے قانون پر بھی غور کر رہے ہیں۔
