ریاض (سی این پی)سعودی حکومت نے کرائے پر گاڑی لینے والے شہریوں کو آگاہ کیا ہے کہ وہ اپنے مکمل کوائف کے ساتھ کوئی بھی گاڑی کرائے پر حاصل کرسکتے ہیں، اعتراض کرنے والی کمپنی کیخلاف شکایت پر کارروائی بھی کی جائے گی۔میڈیا رپورٹس کے مطابق سعودی عرب کی نقل و حمل کی کمیٹی کا کہنا ہے کہ قانون کے مطابق کرائے پر گاڑی حاصل کرنے کے لیے عمر کی کوئی قید نہیں، مقررہ شرائط پوری کرنے والے کو گاڑی کرائے پر دینے میں کوئی امر مانع نہیں ہوگا۔کمیٹی کی جانب سے یہ وضاحت اس وقت سامنے آئی جب سوشل میڈیا کے ایک پلیٹ فام پر کچھ صارفین کی جانب سے کہا گیا کہ قانون کے مطابق رینٹ اے کار کمپنی والوں کی جانب سے عمر سے متعلق اعتراض عائد کرنا مناسب نہیں۔صارفین کا کہنا تھا کہ اگر کار کرائے پر حاصل کرنے والے شخص کے پاس کارآمد ڈرائیونگ لائسنس اور اقامہ بھی ہے تو کوئی امر مانع نہیں کہ اسے کرائے پرگاڑی نہ دی جائے۔سوشل میڈیا پر ہونے والی اس بحث کا نوٹس لیتے ہوئے نقل و حمل کی کمیٹی نے مزید کہا کہ اس سلسلے میں رینٹ اے کار کمپنی کے بارے میں صارفین کو کسی قسم کی شکایت ہو تو ٹول فری نمبر938پر شکایت درج کرائی جاسکتی ہے۔
