لندن(سی این پی)برطانوی دارالحکومت لندن میں چاقو زنی کے واقعات میں دو افراد ہلاک جبکہ 12 زخمی ہوگئے ہیں۔میڈیا رپورٹس کے مطابق واقعات شمال مغربی لندن کے علاقوں کلبرن اور کروڈن میں پیش آئے، لندن ایمبولینس سروس کی جانب سے جاری بیان کے مطابق انہیں اطلاع موصول ہوئی تھی کہ ولڈسن لین میں دو نو جوانوں کو چاقو زنی کے زریعے زخمی کردیا گیا ہے۔اطلاع ملنے پر متاثرہ جگہ پہنچے تو ایک بیس سالہ نوجوان کی لاش پڑی تھی جس کے گلے پر چھری کے نشانات تھے جبکہ دوسرا شخص بری طرح زخمی تھا، جسے فوری طور پر اسپتال منتقل کیا گیا، جہاں اس کی حالت تشویشناک بتائی جاتی ہے۔میٹ پولیس کے مطابق اس طرح کے واقعات جمعے کے روز بھی پیش آئے تھے، جس پر پولیس کے اعلی افسران کو طلب کیا گیا تھا، جہاں دو افراد کو چاقو زنی کا نشانہ بنایا گیا تھا۔ان واقعات کے بعد برینٹ اور ویسٹ منسٹر کے شمال میں سیکشن 60 کے خصوصی اختیارات کا نفاذ کیا گیا، جس کے تحت پولیس کو اضافی سرچ اختیارات دئیے گئے، تاہم ابھی تک کوئی گرفتاری عمل میں نہیں آسکی ہے، میٹ پولیس نے ان واقعات کو الگ تھلگ قرار دیتے ہوئے تحقیقات کا آغاز کردیا ہے۔
