لاہور(سی این پی)پنجاب میں کورونا کے تشویشناک پھیلائو کے پیش نظر لاہور میں ہیلتھ ایمرجنسی نافذ کردی گئی اور تمام اسپتالوں کے ایم ایس صاحبان کو الرٹ کردیا ہے۔تفصیلات کے مطابق لاہورمیں کورونا کیسز میں تشویشناک اضافہ کے بعد محکمہ صحت نے ہیلتھ ایمرجنسی نافذ کردی اور ہیلتھ ایمرجنسی نافذ کرنے کیلئے مراسلہ جاری کر دیا ہے۔محکمہ صحت نے لاہور کے تمام اسپتالوں کے ایم ایس صاحبان کو الرٹ کردیا، جس میں اسپتالوں کے ایم ایس دفاتر کو 24 گھنٹے کھلے رکھنے کی ہدایت کردی ہے۔مراسلے میں کہا گیا کہ تمام اسپتالوں کے انتظامی دفاتر پورا ہفتہ کھلے رہیں گے اور محکمہ اسپیشلائزڈ ہیلتھ کیئراینڈ میڈیکل ایجوکیشن کے عملے کی چھٹی منسوخ کردے۔یاد رہے پاکستان میڈیکل ایسوسی ایشن(پی ایم اے)کے صدر ڈاکٹر اشرف نظامی نے پنجاب میں فی الفور ہیلتھ ایمرجنسی اور سخت اسمارٹ لاک ڈائون کے نفاذ کا مطالبہ کیا تھا۔پنجاب بالخصوص لاہور میں کورونا کیسز کی شرح 18فیصد تک پہنچ گئی اور لاہور میں 10 ماہ کے بعد 1566 کورونا کیسز رپورٹ ہوئے۔محکمہ صحت کا کہنا تھا کہ لاہور میں4 روز میں 5 ہزار 174 کیسز سامنے آئے اور 69 اموات ہوئیں۔
