اوٹاوا(سی این پی) تین دن سے لاپتہ تین سالہ بچہ معجزاتی طور پر جنگل سے زندہ برآمد ہوگیا، بچہ گھر سے آدھے میل کی دوری سے برآمد ہوا۔میڈیا رپورٹ کے مطابق کینیڈا ان دنوں شدید سردی اور برف باری کی لپیٹ میں ہے اور ایسے حالات میں اونٹاریو صوبے کا رہائشی ایک تین سالہ بچہ لاپتہ ہوگیا۔بچہ اتوار کی دوپہر گھر کے باہر کھیلتے کھیلتے اچانک کہیں غائب ہوگیا تھا جس کے بعد سے کسی اسے نہیں دیکھا، بچے کی گمشدگی پر اہل خانہ نے پولیس اور ریسکیو اداروں کو مطلع کیا۔اطلاع ملتے ہی ریسکیو اداروں نے علاقے میں بچے کی تلاش شروع کردی، ریسکیو اہلکاروں کی تین روز تگ و دو کے بعد بچہ آدھے میل کے فاصلے پر واقعے جنگل سے صحیح سلامت مل گیا۔ریسکیو اہلکاروں کا کہنا ہے کہ وہ ندی کے کنارے سوتا ہوا ملا جسے طبی امداد کیلئے اسپتال منتقل کردیا ہے۔ریسکیو اہلکارو کے مطابق بچے نے سردی کے لحاظ سے گرم کپڑے زیب تن کررکھے تھے جو سخت سردی کے باوجود بچے کے زندہ رہنے میں معاون ثابت ہوئے۔
