اسلام آباد(سی این پی) وزیراعظم عمران خان نے تحریک لبیک سے معاہدے کے حوالے سے کل اہم اجلاس طلب کرلیا ، جس میں فرانسیسی سفیر کی ملک بدری کیلئے قرارداد پارلیمنٹ سے منظوری کی تجویز پر غور ہوگا۔تفصیلات کے مطابق وزیراعظم عمران خان کی زیرصدارت تحریک لبیک سے معاہدے سے متعلق اہم اجلاس وزیراعظم ہائوس میں ہوگا، جس میں شاہ محمود، شیخ رشید، پیر نورالحق قادری شریک ہوں گے۔ذرائع کا کہنا ہے کہ اجلاس میں تحریک لبیک کیساتھ ہونیوالے معاہدے پرعملدرآمد سمیت فرانسیسی سفیر کی ملک بدری کیلئے قرارداد پارلیمنٹ سے منظوری کی تجویز پر غور ہوگا۔حکومت نے تحریک لبیک سے معاہدے پر عملدرآمد کیلئے گزشتہ روز کمیٹی بھی تشکیل دی تھی۔یاد رہے گذشتہ سال نومبر میں حکومت اور تحریک لبیک کے درمیان 4نکاتی معدہدہ طے پایا تھا ، جس کے تحت حکومت فرانس کے سفیر کو دو سے تین ماہ میں ملک بدر کرے گی، فرانسیسی سفیر کوپارلیمنٹ سے فیصلہ سازی کے ذریعے ملک بدر کیا جائے گا۔معاہدے میں کہا گیا تھا کہ پاکستانی حکومت فرانس میں سفیر تعینات نہیں کریگی اور فرانس کی مصنوعات کا سرکاری سطح پر بائیکاٹ کیا جائے گا۔معاہدے پر وزیرداخلہ ،وزیرمذہبی امور اور کمشنر اسلام آباد کے دستخط جبکہ تحریک لبیک کی طرف سے صوبائی قائدین کے دستخط موجود ہیں۔
