اسلام آباد(سی این پی )وزیرِ اعظم شہباز شریف نے ورلڈ ایتھلیٹکس چیمپئن شپ 2023 میں چاندی کا تمغہ جیتنے پر ارشد ندیم کو 25 لاکھ روپے انعام دے دیا۔وزیر اعظم شہباز شریف سے جیولن تھرو ایتھلیٹ ارشد ندیم نے ملاقات کی۔شہباز شریف نے جیولن تھرو ایتھلیٹ ارشد ندیم کی خیریت دریافت کی۔
وزیر اعظم نے کہا کہ کم وسائل ہونے کے باوجود ورلڈ چیمپئن شپ میں چاندی کا تمغہ جیتنا قابل فخر ہے، ارشد ندیم آپ کی محنت اور لگن نوجوانوں کے لیے مشعل راہ ہے۔انہوں نے کہا کہ جولین تھرو کھیل کی ترویج کے لیے ارشد ندیم کی خدمات قابل قدر ہیں، پاکستان میں بے پناہ ٹیلنٹ ہے اسے نکھارنے کی ضرورت ہے۔وزیرِ اعظم نے ورلڈ ایتھلیٹکس چیمپئن شپ 2023 میں چاندی کا تمغہ جیتنے پر ارشد ندیم کو 25 لاکھ روپے انعام دے دیا اور ان کے آبائی علاقے میں زیرِ تعمیر اسپورٹس کمپلیکس کا کام تیز تر کرنے کی ہدایت بھی کی۔
