0

ٹک ٹاک پر پابندی کیخلاف درخواست، پی ٹی اے سے رولز کے حوالے سے تفصیلات طلب

اسلام آباد(سی این پی)اسلام آباد ہائی کورٹ نے پی ٹی اے سے رولز کے حوالے سے تفصیلات طلب کر لیں۔ چیف جسٹس اطہر من اللہ نے کہا کہ کون لوگ یہ فیصلہ کرتے ہیں کہ کیا درست ہے اور کیا غلط، اس لئے رولز بنانے بہت ضروری ہیں، دنیا آگے جا رہی ہے اور آپ پیچھے لے کر جا رہے ہیں۔اسلام آباد ہائیکورٹ میں ٹک ٹاک پر پابندی اور پی ٹی اے رولز فریم نہ کرنے کے خلاف درخواست پر سماعت ہوئی۔ وکیل پی ٹی اے نے ٹک ٹاک انتظامیہ کے ساتھ پی ٹی اے کے مذاکرات ہوتے رہنے کا موقف اپنایا۔چیف جسٹس اطہر من اللہ نے استفسار کیا کہ پی ٹی اے میں اس طرح کے فیصلے کون کر رہا ہے کیا کچھ لوگ یہ فیصلہ کرتے ہیں ؟ کورونا کے دوران ٹک ٹاک کم مراعات یافتہ طبقے کیلئے آمدن کا ذریعہ رہا ہے، ٹک ٹاک انٹرٹینمنٹ کا ایک اہم ذریعہ رہا ہے، موٹروے پر بھی ایک واقعہ پیش آیا تھا پھر موٹروے کو بھی بند کر دیں۔عدالت کا کہنا تھا کہ پوری دنیا میں یہ نہیں ہوتا، دنیا آگے جا رہی ہے اور آپ پیچھے لے کر جا رہے ہیں، ہماری اخلاقیات اتنی مضبوط ہونی چاہئیں کہ کوئی چیز ان پر اثرانداز نہ ہو سکے۔ اسلام آباد ہائی کورٹ نے رولز کے حوالے سے تفصیلات طلب کرتے ہوئے سماعت 4 ہفتے کے لیے ملتوی کر دی۔

اپنا تبصرہ بھیجیں